Que é o SIGPAC e como identificar o recinto da túa parcela
Actualizado: setembro de 2026
O SIGPAC é o Sistema de Información Xeográfica de Parcelas Agrícolas: o mapa oficial co que a Administración identifica cada anaco de terreo con uso agrario en España. Mantéñeno o Ministerio de Agricultura e as comunidades autónomas, e é a referencia que se usa para a PAC e para identificar as túas parcelas no caderno de explotación.
Por que che piden o SIGPAC
Desde o 1 de xaneiro de 2026, o rexistro de tratamentos fitosanitarios ten que identificar a parcela tratada, e a forma oficial de facelo en España é o recinto SIGPAC. Se apuntas «o viñedo de arriba», ese caderno non cumpre. Se apuntas o recinto, si.
Como se le un código SIGPAC
Non é un número solto: son sete pezas que van do grande ao pequeno.
- Provincia e concello: onde está.
- Agregado e zona: divisións administrativas internas do concello. En moitos sitios valen cero.
- Polígono e parcela: a finca tal e como a coñece o catastro rústico.
- Recinto: o anaco concreto dentro desa parcela que ten un mesmo uso. Unha parcela con viñedo e un recuncho de pasto son dous recintos.
O recinto é a unidade que importa, porque é o que ten un uso, unha superficie e unhas características propias.
O uso SIGPAC
Cada recinto leva un código de uso de dúas letras. Os que máis se ven: TA terra arable, PS pasteiro, PR pasto arbustivo, VI viñedo, FY froiteira, OV olival, FO forestal. Ese uso condiciona as axudas que podes pedir e o que se espera que cultives aí.
Xunto ao uso, o recinto garda outros datos útiles: a superficie oficial, a pendente media, o coeficiente de regadío e a admisibilidade a efectos da PAC. Son os números cos que a Administración mira a túa parcela, así que convén que sexan os mesmos que manexas ti.
O SIGPAC en Galicia: moitos recintos e pequenos
Aquí o minifundio nótase no mapa. Unha explotación galega media xunta ducias de recintos pequenos, espallados e moitas veces en concellos distintos. Iso ten dúas consecuencias prácticas: a primeira, que anotar á man é inviable en canto pasas de dez parcelas; a segunda, que a superficie SIGPAC e a que ti tes na cabeza adoitan bailar, porque entre muros, camiños e rego hai metros que o recinto non conta como agrarios.
No trámite galego a identificación é a mesma: cando presentas o teu caderno, o que viaxa é o recinto, non o nome da leira. En Galicia o trámite é o MR407B e o rexistro autonómico onde acaban eses datos é o XEAGA.
SIGPAC e catastro non son o mesmo
É a confusión máis habitual. O catastro di de quen é o terreo e canto vale a efectos fiscais; o seu identificador é a referencia catastral de vinte caracteres, a que aparece no recibo do IBI. O SIGPAC di que se cultiva nel e con que superficie agraria. O mesmo anaco de terra ten os dous, e non sempre coinciden en superficie, porque miden cousas distintas.
Como obter o teu sen pelexar co visor
A vía oficial é o visor SIGPAC do Ministerio ou o da Xunta: buscas por provincia, concello, polígono e parcela, e vas afinando ata dar co recinto. Funciona, pero hai que saber de antemán o polígono e a parcela, que é xusto o que moita xente non ten á man.
En Agro GPS facémolo ao revés: escribes a referencia catastral, a que si tes no recibo do IBI, ou tocas a parcela no mapa, e o recinto, o uso e a superficie SIGPAC énchense sós. A partir de aí, cada labor que apuntes queda ligada a ese recinto no formato que pide o caderno dixital.